‘फरक आस्था र विचार राख्नेलाई अपराधि जस्तो व्यवहार गर्ने, फेसबुकमा गालीगलौज गर्ने, चरित्र हत्या गर्नेको फेसबुक कमेन्ट स्क्रिनशट गरि पुस्तक तयार पार्ने र गालीगलौज गर्नेको घरमा पुर्याउने अभियान एमाले बाँकेले थालेको छ,’ उनले भने ।
बाँके, २३ भाद्र ।
एमाले बाँकेले सामाजिक सञ्जालमा बढ्दै गएको गालीगलौज, चरित्रहत्या तथा अपमानजनक अभिव्यक्तिप्रति आपत्ति जनाएको छ । पार्टी कार्यालयमा मंगलवार आयोजित पत्रकार सम्मेलनमा अध्यक्ष निरक गुरुङले फरक राजनीतिक आस्था राख्न पाउने लोकतन्त्रको उपहार भएको बताउँदै कसैको चरित्र हत्या गर्ने गरि फेसबुकमा आएका गालीगलौज संकलन गरि पुस्तक तयार पार्ने बताए ।
उनले राजनीतिक बहसलाई मर्यादित, तथ्यमा आधारित र जिम्मेवार बनाउन आग्रह गरे । ‘फरक आस्था र विचार राख्नेलाई अपराधि जस्तो व्यवहार गर्ने, फेसबुकमा गालीगलौज गर्ने, चरित्र हत्या गर्नेको फेसबुक कमेन्ट स्क्रिनशट गरि पुस्तक तयार पार्ने र गालीगलौज गर्नेको घरमा पुर्याउने अभियान एमाले बाँकेले थालेको छ,’ उनले भने ।
भदौ १४ गते बसेको पार्टी सचिवालय बैठक र भदौ १७ गते बसेको बुलेटिन प्रकाशन समितिको बैठकका निर्णय सार्वजनिक गर्न आयोजित पत्रकार सम्मेलनमा एमाले बाँकेले सामाजिक सञ्जालमा राष्ट्रिय स्वतन्त्र पार्टी (रास्वपा) तथा त्यसका केही नेता–कार्यकर्ताबाट व्यक्त हुने अभद्र अभिव्यक्तिले सामाजिक वातावरण संवेदनहीन र विकृत बन्दै गएको आरोप एमालेले लगाएको छ । ‘त्यस्ता अभिव्यक्ति सार्वजनिक गर्दा सम्बन्धित व्यक्तिको राजनीतिक तथा सामाजिक स्तरबारे नागरिकलाई मूल्यांकन गर्न सहज हुने छ,’ उनले तर्क गरे ।
गुरुङले सामाजिक सञ्जाललाई व्यक्तिगत आक्रमण र चरित्रहत्या गर्ने माध्यम नभई राजनीतिक विचार तथा आलोचना प्रस्तुत गर्ने सभ्य माध्यम बनाउनुपर्नेमा जोड दिए ।
पार्टीले पीडितले आफ्ना पीडा तथा गुनासा सार्वजनिक गर्दा समेत सामाजिक सञ्जालमा गालीगलौज र व्यक्तिगत आक्रमण गर्ने प्रवृत्ति बढेको जनाएको छ । राजनीतिक विचार फरक हुनु, सरकारको कामको आलोचना गर्नु वा कुनै दल तथा नेताको नीतिमाथि प्रश्न उठाउनु लोकतन्त्रमा स्वाभाविक भए पनि आलोचनाका नाममा आमाको नाम जोडेर गाली गर्ने, चरित्रमाथि प्रश्न उठाउने, अश्लील शब्द प्रयोग गर्ने र व्यक्तिगत अपमानमा उत्रिने कार्य राजनीतिक संस्कार नभएको एमालेको भनाइ छ ।
पार्टीका निर्णयबारे उपसचिव निर्मला सुनारले विज्ञप्ति वाचन गर्दै सामाजिक सञ्जाल विचार आदानप्रदानको लोकतान्त्रिक माध्यम भए पनि त्यसलाई घृणा, आक्रोश र प्रतिशोध फैलाउने माध्यम बनाउन नहुने बताइन् ।
एमाले बाँकेले राजनीतिक असहमतिको जवाफ गाली, धम्की वा व्यक्तिगत आक्रमणबाट नभई तथ्य, तर्क र जिम्मेवार राजनीतिक व्यवहारबाट दिनुपर्नेमा जोड दिएको छ । जनताले सरकार र राजनीतिक दललाई प्रश्न गर्ने अधिकारसँगै राजनीतिक नेतृत्वले ती प्रश्नको जवाफ दिने संस्कार विकास गर्नुपर्ने पार्टीको धारणा छ ।
सामाजिक सञ्जालको दुरुपयोगसम्बन्धी उजुरी ठूलो संख्यामा पर्ने गरेको उल्लेख गर्दै एमाले बाँकेले चरित्रहत्या, अशिष्ट अभिव्यक्ति तथा घृणा र द्वेष फैलाउने गतिविधिमाथि अनुसन्धान र कारबाही प्रभावकारी बनाउन नेपाल प्रहरीसहित सम्बन्धित निकायको ध्यानाकर्षण गराएको छ ।
यसैबीच, एमाले बाँकेले १० भाद्रमा रुसुवामा आएको बाढी तथा पहिरोमा उद्धार, व्यवस्थापन र राहत वितरणमा सरकार असफल भएको आरोप समेत लगाएको छ । घटनाको गम्भीरता समयमै बुझ्न नसक्दा ठूलो मानवीय क्षति भएको भन्दै पार्टीले सरकारको कार्यशैलीप्रति असन्तुष्टि जनाएको छ ।
