नेपालगन्जमा सरसफाई अभियान : ३ नं. वडाको सडकमा निर्माण सामग्री राखे कारवाही

बाँके, ३२ साउन ।


नेपालगन्ज उपमहानगरपालिका ३ नं. वडा कार्यालयले सडकमा निर्माण सामग्री –गिट्टी, बालुवा, मोरङ, ढुंगा) राख्नका लागि अनुमति लिने नीति बनाएको छ । सडकमा महिनौसम्म निर्माण सामग्री राख्दा सवारी दुर्घटना हुने र वडाको सौन्दर्यतामा असर परेको भन्दै वडा कार्यालयले निश्चित समयसम्म मात्र निर्माण सामग्री सडकमा राख्न दिने नियम बनाएको अध्यक्ष मोहम्मद अय्युव सिद्धिकीले बताए ।
उनले नमुना वडा बनाउन वडा कार्यालयले अभियान सुरु गरेको बताउँदै फोहर ब्यवस्थापनका लागि सचेतना अभियान संचालन भइरहेको जानकारी दिए । ‘वडा सदस्यहरु वडाका प्रत्येक घरमा पुगेर वडाबासीको नाम, फोन नम्बर टिप्नु भएको छ । र, वडाबासीले फोहर नगर्ने पत्रमा हस्ताक्षर समेत गर्नु भएको छ,’ अध्यक्ष सिद्धिकीले भने ।

सरसफाई अभियानका बारेमा वडा अध्यक्ष मोहम्मद अय्यूव सिद्धिकी के भन्छन् ? हेर्नुस भिडियो :


उनले फोहर ब्यवस्थापनका लागि सचेतना जगाउन तीन दिनसम्म माइकिङ गरेको बताउँदै शुक्रवार विहान साढे १० बजेदेखि अनुगमन गर्ने कार्यक्रम रहेको बताए । ‘शुक्रवारदेखि अनुगमनमा जान्छौँ । जसको घर अगाडी फोहर देख्छौँ त्यसलाई बोलाएर फोहर किन गरेको हो भनि सोध्छौँ र फोहर नगर्न सुझाव दिनेछौँ,’ उनले भने ।
फोहर गर्नेलाई पहिलो चरणमा पाँच सय रुपैयाँ जरिवाना तोकिएको उनको भनाई छ । कुहिने र नकुहिने बस्तु राख्न वडामा डष्टविनको ब्यवस्था गरिएको उनले बताए । वडा कार्यालयले प्लाष्टिक नियन्त्रण गर्न लुगाको झोला प्रयोग गर्न आह्वान गरेको छ । ‘कुहिने र नकुहिने फोहोर वर्गिकरण गरि छुट्टाछुट्टै भाँडोमा राखौँ । सम्भव भएसम्म कुहिने फोहोरको कम्पोष्ट मल आफ्नो करेसाबारीमा प्रयोग गरौँ,’ ३ नं. वडा कार्यालयले जारी गरेको अपिल पत्रमा उल्लेख छ ।

Previous articleतिलक ढकाल डब्लुडब्लुएनको अध्यक्षमा निर्वाचित
Next articleमानव बेचविखन तथा ओसार पसार नियन्त्रण गर्न नीति बनाऊ

LEAVE A REPLY

Please enter your comment!
Please enter your name here