बाँके, २८ जेठ, २०७९ ।
कोहलपुरमा विद्युतिय गाडी चार्ज गर्ने चार्जिङ सेन्टर संचालनमा ल्याइएको छ । वीवी इन्टरप्राइजेज प्रालिले विद्युतिय गाडी चार्ज गर्न कोहलपुरमा विद्युतिय गाडी चार्जिङ प्वाइन्ट एण्ड रिफ्रेस सेन्टर संचालनमा ल्याएको प्रोप्राइटर विष्णु खनालले बताए । उनले पश्चिम नेपालमा पहिलो पटक विद्युतिय गाडी चार्जिङ प्वाइन्ट एण्ड सिफ्रेस सेन्टर संचालनमा ल्याएको दावी गरे ।
बीबी चार्जिङ प्वाइन्टले एक पटक गाडी चार्ज गरेको पाँच सय रुपैँया शुल्क लिने गरेको छ । नारायणघाट भन्दा पश्चिममा कोहलपुर र महेन्द्रनगरमा विद्युतिय चार्जिङ प्वाइन्ट स्थापना भई संचालनमा ल्याएको उनले बताए । उनले केहि दिनभित्र दाङको अमिलिया, भालुबाङ र सुर्खेतमा चार्जिङ प्वाइन्ट संचालनमा ल्याउन लागेको बताए । ‘पूर्व–पश्चिम राजमार्ग अन्तरगत विभिन्न ठाउँमा चार्जिङ प्वाइन्ट संचालनमा ल्याउने हाम्रो योजना छ,’ उनले भने ।
गाडी एक पटक चार्ज गरेपछि कम्तीमा दुई सय किलोमिटर दूरी यात्रा गर्न सकिने उनको भनाई छ । उनले ठूलो र साना गाडी ३० मिनेटमा चार्ज हुने जानकारी दिए । ‘हुन त गाडी फुल चार्ज हुन २०–३० मिनेट लाग्छ, तर पहिलो चरणमा हामीले एक घण्टा लगाएर चार्ज गर्दै आएका छौँ,’ खनालले भने ।
उक्त चाजिङ प्वाइन्टमा अहिले ६–८ वटा गाडी नियमित रुपमा चार्ज गर्न आउने गरेको बताए । एक पटक जार्च गरेपछि सुर्खेतको वीरेन्द्रनगर पुगेर फर्किन सकिने उनको भनाई छ । उनले विद्युतिय गाडी किन्ने बेला महंगो परे पनि विजनेशमा सस्तो रहेको बताए । ‘कोहलपुरबाट सुर्खेतको वीरेन्द्रनगरसम्म जान र आउन अरु गाडीमा सात हजारको डिजेज हाल्नु पर्छ, तर यो गाडीलाई पाँच सयको चार्ज गरे पुग्छ,’ उनले भने, ‘मर्मत सम्भारमा लाग्ने रुपैँया पनि यो गाडीले बचत गर्छ ।’
