बाँके, २३ असोज, २०७८ ।
बाँकेका प्रमुख जिल्ला अधिकारी शिवराम गेलालको सरुवा भएको छ । गृह मन्त्रालयले शुक्रबार गरेको चार जिल्लाका प्रमुख जिल्ला अधिकारी (सिडिओ) को सरुवामा उनी पनि परेका हुन् ।
गेलालको ठाउँमा उपसचिव सूर्य खत्री आउने भएका छन् । खत्रीलाई कामु सिडिओको रुपमा पठाइएको छ । उनी गत महिनामात्र उद्योग मन्त्रालयबाट गृहमा आएका थिए ।
गृहले पर्सा, रौतहट र सुनसरीका सिडिओको पनि सरुवा गरेको छ । पर्सामा उमेश ढकाललाई पठाइएको छ । उनी सुनसरी सिडिओ थिए । रौतहटमा सिडिओका रूपमा कार्यरत इन्द्रदेव यादवलाई सुनसरीको सिडिओ बनाइएको छ ।
गृहले गत साता मात्र एक दर्जन जिल्लाका सिडिओ हेरफेर गरेको थियो ।
