बाँके, २८ चैत ।
भेरी अस्पतालमा पिसिआर जाँच गराउँदा कोरोना संक्रमण पुष्टि हुनेको संख्या पनि बढ्दै गएको छ । २८ चैतका दिन मात्र नेपालगन्जका २९ जनामा कोरोना पुष्टि भएको कोरोना फोकल पर्सन ओलीले जानकारी दिए । नेपालगन्ज र कोहलपुरका विभिन्न पिसिआर ल्याबमा स्वाब परीक्षण गराएका मध्ये बाँकेका २९ र बाहिरी जिल्लाका ११ जनामा कोरोना पुष्टि भएको उनले जानकारी दिए ।
दुई महिना अघि भेरी अस्पतालको आइसोलेसनमा ८–१० जनामात्रै थिए । अहिले सक्रिय संक्रमितको संख्या १०९ पुगेको उनले बताए । ‘संक्रमितको संख्या घट्दै गएपछि आइसोलेसन बन्द हुने अवस्थामा पुगेको थियो । पछिल्लो १५ दिनमा बढेर १०९ जना पुगेका छन्,’ उनले भने ।
बाँकेका १०९ संक्रमित मध्ये सात जनाको स्वास्थ्य अवस्था गम्भिर रहेको उनले बताए । ‘यसैगरि बढ्दै गए भेरी अस्पतालको आइसोलेसनले धान्न नसक्ने हुन सक्छ,’ उनले भने, ‘समयमा ध्यान नदिने हो भने अवस्था गम्भिर हुन सक्छ ।’
