विमला चौधरी
बाँके, ६ चैत ।
बाँके जिल्ला पूर्ण खोप सुनिश्चित हुईलक् जिल्ला घोषणा हुइल बा । जिल्ला पूर्ण खोप समन्वय समितिक संयोजक अजय श्रीवास्तव शुक्रवार नेपालगन्जम एक कार्यक्रमक बीच पत्र पहर्ख जिल्लाह पूर्ण खोप सुरक्षित हुइलक् घोषणा कर्ल ।
घोषणसभाम बोल्टी लुम्बिनी प्रदेशक् सामाजिक विकासमन्त्री सुदर्शन बराल बाँके पूर्ण खोप जिल्ला घोषणा ह्वाय सफल हुइलकम सक्कुजहन् बधाई डेटी खोपप्रतिक जागरण आन सम्बद्व सरोकारवालाहुँकन निर्देशन डेल ।
बाँकेम जर्मलठेसे १५ महिना उमेर समूहक १० हजार ९ सय ५६ जन लर्कापर्का खोप लगैल बाट । छुट्ल १६ ठेसे २३ महिना उमेर समुहक ९ सय ५४ जन फे खोप लगाईल पाछ जिल्लाह पूर्ण खोप सुनिश्चित जिल्ला घोषणा कैगिलक स्वास्थ्य कार्यालय बाँकेक् खोप सुपरभाइजर भेषराज शर्मा जानकारी डेल ।
बाँके पूर्णखोप सुनिश्चित जिल्ला घोषणा हुईलसँघ लुम्विनी प्रदेशक् ९ जिल्ला पूर्ण खोप सुनिश्चित हुईल बाट । १२ ठो जिल्लामध्ये आब बर्दिया, कपिलवस्तु ओ रुकुमपुरुव जिल्ला केल पूर्ण खोप घोषणा हुईना बाँकी बाट ।
जिल्ला पूर्ण खोप समन्वय समितिक् संयोजक अजय श्रीवास्तवक् सभापतित्वम हुईलक् पूर्ण खोप जिल्ला घोषणा सभाम प्रदेश सांसद आइपी खरेल, लुम्बिनी प्रदेशक् स्वास्थ्य निर्देशक डा. बिनोदकुमार गिरि, राष्ट्रिय खोप समन्वय समितिक् सदस्य सचिव डा. झलक गौतम, स्वास्थ्य कार्यालय बाँकेक् प्रमुख धिरजंग शाह, खजुरा गाउँपालिकक् प्रमुख किस्मतकुमार कक्षपती, महिला स्वास्थ्य स्वमसेविका अक्षय कोषक् संयोजक नारायणी रुपाखेती लगायत आपन धारणा ढर्ल रलह ।
