बाँके, १४ माघ ।
कोरोना विरुद्धको खोप अभियान अन्तरगत भेरी अस्पतालमा कार्यरत १२० जनाले कोरोना विरुद्धको खोप लगाएका छन् । भेरी अस्पतालमा स्थायी, अस्थायी, करार, ज्यालादारी लगायत गरि चार सयको हाराहारीमा चिकित्सक, स्वास्थ्यकर्मी, सरसफाईकर्मी, कर्मचारी, सुरक्षा गार्ड लगायत कार्यरत छन् । खोप अभियान अन्तरगत पहिलो खोप भेरी अस्पतालका प्रमुख मेडिकल सुरपरिटेन्डेन्ट डा. प्रकाशबहादुर थापाले लगाए ।
खोप अभियानका पहिलो दिन भएकोले कोरोना विरुद्धको खोप लगाउनेको संख्या कम देखिएको डा. थापाले बताए । उनले बुधवार ढिलागरि सुरु भएकोले पनि खोप लगाउनेको संख्या थोरै देखिएको बताए । चिकित्सक, स्वास्थ्यकर्मी र अन्य कर्मचारीको समय नमिलेर बुधवार खोप लगाउन छुटेको उनले दावी गरे ।
उनले भेरी अस्पतालमा कार्यरत सवैले खोप लगाउने बताए । लगाउन त सवैले लगाउँछन् । ‘कोही पहिलो दिन भएर डराएका पनि होलान । कोही रातीको ड्यूटी सकेर घर गइसकेका थिए होला । कसैको बेलुकी ड्यूटी हुन्छ । समय मिलाएर सवैले कोरोना विरुद्धको खोप लगाउने छन्,’ डा. थापाले भने ।
विहीवार भोली नरैनापुर, डुडुवा गाउँपालिका र नेपालगन्ज मेडिकल कलेजमा कार्यरत कर्मचारीलाई लगाउने तालिका छ । ‘विहीवार सात सय ५० जनालाई लगाउने योजना छ,’ डा. थापाले भने, खोप लिन बाँकी रहेका भेरी अस्पतालका कर्मचारीले पनि विहीवार लगाउन पाउने छन् ।’
