भेरी अस्पतालमा कोरोना जाँच बापत अब शुल्क लाग्ने, शुल्क १८ भाद्रमा निर्धारण

बाँके, १७ भाद्र ।
नेपालगन्जस्थित भेरी अस्पतालले शुल्क लिएर पिसिआर विधिबाट कोरोना परीक्षण गर्ने अनुमति पाएको छ । भेरी अस्पतालमा संचालनमा रहेको पिसिआर प्रयोगशालाले स्वास्थ्य तथा जनसंख्या मन्त्रालयबाट कोभिड–१९ राष्ट्रिय परीक्षण निर्देशिकाले तोकेको भन्दा ब्यक्तिगत प्रयोजनका लागि शुल्क तिरेर आरटी पिसिआरको स्वीकृति पाएको भेरी अस्पताल विकास समितिका अध्यक्ष प्रमोदकुमार धितालले बताए ।
उनले बाहिरी जिल्ला जानका लागि पिसिआर गराउनेहरुसँग शुल्क लिने बताए । प्रशासनको सिफारिसको आधारमा सेना, नेपाल प्रहरी, सशस्त्र प्रहरी र निजामति कर्मचारीको निशुल्क कोरोना जाँच गरिने बताए । कोरोनाको लक्षण देखिएर भेरी अस्पतालमा भर्ना भएका विरामीको पनि निशुल्क कोरोना परीक्षण गरिने अध्यक्ष धितालले बताए । ‘गरिव, असहाय, जेष्ठ नागरिक र कोरोनाको संकेत देखिएका विरामीको निशुल्क कोरोना परीक्षण गर्ने निर्णय भएको छ,’ उनले भने ।
स्वास्थ्य मन्त्रालयले शुल्क लिएर कोरोना परीक्षण गर्ने अनुमति दिए पनि शुल्क निर्धारण अझैँ नभएको अस्पताल विकास समितिका सदस्य धनिराम ओलीले बताए । उनले विज्ञहरुसँग सल्लाह लिएर शुल्क निर्धारण गरिने बताए । १८ भाद्रमा बस्ने समितिसहितको बैठकले शुल्क निर्धारण गर्ने उनको भनाई छ । ‘बाहिरका अस्पतालले निर्धारण गरेको शुल्कको मूल्यांकन गरि निर्धारण गरिने छ,’ ओलीले भने ।

Previous articleजिल्ला अस्पताल, बर्दियामा पिसिआर विधिबाट कोरोना परीक्षणको तयारी सुरु
Next articleरकम लिएको चार आर्थिक बर्ष सकियो, तर आएन एम्बुलेन्स

LEAVE A REPLY

Please enter your comment!
Please enter your name here