संक्रमितको उपचारका लागि शिक्षण अस्पताल कोहलपुरको तयारी यस्तो छ

बाँके, २८ जेष्ठ ।
कोरोना भाइरस लागेका विरामीको उपचारका लागि सम्पूर्ण ब्यवस्था मिलाइएको नेपालगन्ज मेडिकल कलेज शिक्षण अस्पताल, कोहलपुरले जनाएको छ । शिक्षण अस्पताल, कोहलपुर कोरोना संक्रमण भई जटिल खालका रोग लागेका विरामीको अप्रेशन सहित उपचार गर्ने अधिकार पाएको छ ।
सरकारले नेपालगन्ज शिक्षण अस्पताललाई तेस्रो श्रेणीको अस्पतालको रुपमा स्तरोन्नती गरि कोरोना लागेर जटिल खालका रोग लागेका विरामीको अप्रेशन सहित उपचार गर्ने जिम्मा दिएको छ । त्यहि जिम्मा अनुसार शिक्षण अस्पतालले अछामकी कोरोना संक्रमित महिलाको आन्द्राको अप्रेशन गरि उपचार गरिरहेको छ । ति महिला १८ हप्ताकी गर्भवती हुन् ।
अस्पतालका उप–निर्देशक दिनेश श्रेष्ठले जटिल खालका स्वास्थ्य समस्या भएका कोरोना संक्रमित विरामीको उपचार गर्ने जिम्मा पाएको बताए । उनले कोरोना संक्रमितको उपचारका लागि चिकित्सक र स्वास्थ्यकर्मीलाई तयारी अवस्थामा राखिएको बताउँदै क्षति न्यूनिकरणका लागि सजग भएको बताए । ‘अन्य अस्पतालले भोगेका समस्याबाट पाठ सिकेर अस्पतालले नयाँ रणनीति बनाएको छ,’ उनले भने ।
उपचारमा संलग्न चिकित्सक र स्वास्थ्यकर्मीका लागि अस्पताल र अस्पतालको चिसापानीस्थित क्याम्पसमा क्वारेन्टाइन बनाइएको उनको भनाई छ । पहिलो पटक जटिल खालका कोरोना संक्रमितको उपचारमा संलग्न भएका चिकित्सक र स्वास्थ्यकर्मीले सात दिनसम्म अस्पतालको क्वारेन्टाइनमा बस्ने र उनीहरुले सात दिनसम्म सोही क्वारेन्टाइनमा बसेर थप आएका विरामीको उपचार गर्ने उनले बताए ।
‘उपचारमा संलग्न स्वास्थ्यकर्मीको सात दिनपछि पिसिआर जाँच गरिने छ । र, उनीहरुलाई थप १४ दिनका लागि चिसापानीस्थित क्याम्पसको क्वारेन्टाइनमा राख्ने ब्यवस्था मिलाइएको छ,’ डा. श्रेष्ठले भने, ‘त्यतिन्जेल क्वारेन्टाइनमा जाने टोलीलाई पालो दिने अर्को चिकित्सकसहितको टोली तयार भइसक्छ ।’

Previous articleअझैँ फेला परेनन् आइसोलेशनबाट भागेका संक्रमित
Next articleदैलेखका कृष्णको परिवारले पाए भारत सरकारबाट दुईलाख रुपैँया

LEAVE A REPLY

Please enter your comment!
Please enter your name here