एन्फाद्वारा आगामी वर्षका लागि ७० करोड बजेट विनियोजन

काठमाडौं– अखिल नेपाल फुटबल संघ  (एन्फा)ले आगामी आर्थिक वर्षका लागि ७० करोडको बजेट विनियोजन गरेको छ ।

सोमबार बसेको कार्यसमति बैठकले विनियोजन गरेको बजेटको ५६ प्रतिशत फिफाको अनुदान, १० प्रतिशत एएफसीको अनुदान र बाँकी ३४ प्रतिशत एन्फाको स्रोतबाट बजेटको व्यवस्थापन हुने जनाएको छ ।

यसैगरी नोबेल कोरोना भाइरसको महामारीबाट फुटबलमा भएको क्षति न्युनीकरणका लागि फिफाले दिएको राहत प्याकेजबाट १ लाख डलर बबराबर राहत वितरण गर्ने निर्णय गरेको छ ।

बैठकले ए, बी र सी डिभिजन क्लबहरुलाई समान ७५–७५ हजार राहत दिने समेत निर्णय गरेको छ । जिल्ला संघहरुलाई पनि ७५ हजारका दरले सहयोग गर्ने निर्णय गरेको छ ।

बैठक झण्डै ७ घण्टा चलेको थियो । भर्चुअल बैठकमा एन्फा कार्यसमितिका सदस्यहरुले आ-आफ्ना धारणाहरु राखेका थिए ।

बैठकमा विवाद र शक्ति संचयका कुराहरु समेत उठेको सहभागी एक सदस्यले खबरहबलाई बताए ।

केही दिन अगाडि एन्फाले ललितपुर जिल्ला फुबटल संघका अध्यक्ष पुरुषोत्तम थापामाथिको कारबाहीको कुराले पनि स्थान पाएको उनले बताए ।  एन्फा अध्यक्ष कर्मा छिरिङ शेर्पाको विवादस्पद अभिव्यक्त्तिको समेत बैठकमा कुरा उठेको उनले बताए ।

एन्फा केन्द्रीय सदस्य दाबा लामाले अध्यक्षमाथि ठाडो प्रश्न उठाएपछि त्यसले छलफल निकै लम्बाएको स्रोतले बताएको छ ।

‘दाबाजीले अध्यक्ष शेर्पामाथि औला उठाउँदै ललितपुर जिल्ला अध्यक्षलाई अनुसाशनको कारबाही हुन्छ भने विवादास्पद अभिव्यक्ति दिने तपाईलाई किन कारबाही नगर्ने भन्दै प्रश्न गरेका थिए, ’ स्रोतले भन्यो ।

एन्फा अध्यक्ष शेर्पाले एक अनलाइन सञ्चारलाई दिएको अन्तर्वार्ताको अभिव्यक्तिले तराईका जनताको भावनामा चोट पुगेको भन्दै प्रतिनिधिसभामा  समेत विरोध भएको थियो ।

फुटबलको गभर्निङ बोडीको बैठक बसे पनि कोरोना महामारीले थलिएको फुटबललाई कसरी शुरु गर्ने वा कहिले देखि सुरुगर्न सकिन्छ भन्ने विषयले भने स्थान नपाएको स्रोतले बताएको छ ।

‘आजको बैठकले खासगरी कोरोनाले थलिएको फुटबललाई कसरी, कहिलेसम्म फर्काउने भन्ने छलफल गर्ने अनुमान गरिएको थियो,’ स्रोतले भन्यो, ‘तर, छलफल जति लामो भएपनि त्यसमा सहभागी एक जनाले पनि फुटबलका बारेमा चिन्ता र चाँसो नदेखाउनु नेपाली फुटबलका लागि चिन्ताको विषय हो । कलह र एक अर्काको बचाउ मै कार्य समिति बैठक सम्पन्न हुनु दुखद् हो ।’

बैठकले राष्ट्रिय टोलीका ३५ जना पुरुष र ३५ जना महिला टोलीका सदस्यलाई १५ हजारका दरले सहयोग प्रदान गर्ने निर्णय गरेको छ । एन्फा प्रशिक्षक, एन्फा कर्मचारी र लिग रेफ्रिहहरुलाई १० हजारका दरले राहत दिने निर्णय समेत भएको छ ।

यस्तै, एन्फाको साधारण सभा भाद्र १५ गते गर्ने निर्णय पनि कार्यसमिति बैठकले गरेको छ । कोरोना भाइरसको महामारी नरोकिए भर्चुअल साधारण सभा गर्ने निर्णय समेत भएको छ ।

खबर हबबाट साभार ।

Previous articleचलचित्र साइनो युट्युबमा रिलिज
Next articleसांसद गंगा चौधरीले भनिन् : संसदमा भारतीय चेलीहरुको दादागिरी चल्न थाल्यो

LEAVE A REPLY

Please enter your comment!
Please enter your name here